Plani i veprimit për fëmijë 2012-2015

Fillimi i vitit shkollor 2015-2016

Shpërndarja e teksteve falas dhe debate mbi fëmijët Rom dhe Egjiptian në vitin shkollor 2015-2016

Shqyrtim Rasti dhe debati mbi migrimin masiv të qytetarëve shqiptarë drejt vendeve të BE-së

Sikur te jetoja ne nje qytet te tille

Dita Portokalli në Kuvendin e Shqipërisë

heforshe-banner

Dita Portokalli në Kuvendin e Shqipërisë

Nxënëset/it e shkollave të Tiranës dhe studentet/ët e Universitetit të Arteve, nga Kuvendi i Shqipërisë nxisin politikëbërëset/it dhe shoqërinë shqiptare, në veçanti djemtë dhe burrat, për të luftuar dhunën me bazë gjinore dhe atë në familje, si dhe diskriminimin e grave dhe vajzave në Shqipëri.

Tiranë, 6 mars 2015, ora 10.00

Kuvendi i Shqipërisë

Kuvendi i Shqipërisë, mirëpriti sot nxënëset/it e shkollave të mesme “Gramoz Palushi” Paskuqan, “Androkli Kostallari” Shkozë dhe “Mustafa Gerblleshi” Sauk, të cilët së bashku me studentet/ët dhe pedagoget/ët e Universitetit të Arteve realizuan një aktivitet sensibilizues mbi çështjet e barazisë gjinore dhe mosdiskriminimit, si dhe rolit që duhet të luajnë djemtë dhe burrat si partnerë dhe aleatë për eliminimin e dhunës me bazë gjinore e asaj në familje. Të rinjtë zhvilluan aktivitete artistike në pikturë, aktrim dhe grafikë, duke përcjellë mesazhe kundër dhunës, diskriminimit e pabarazive që ekzistojnë në shoqërinë shqiptare sot.

I pranishëm në këtë aktivitet ishte edhe Kryetari i Kuvendit, Z. Ilir Meta, i cili mirëpriti të rinjtë dhe të rejat dhe përgëzoi këtë nismë të tyre duke theksuar se “Dhuna ndaj grave dhe fëmijëve sot është një fenomen që nuk duhet kurrë të rreshtin së dënuari. Dhuna ndaj grave dhe fëmijëve nuk mund të tolerohen, sidomos në një shoqëri si e jona, që familjen e sheh si një bërthamë të shenjtë, dhe pikërisht kjo kulturë civile duhet promovuar dhe duhet mbrojtur nga të gjithë. Unë gjithnjë kam besuar se fëmijët, të rinjtë dhe familja duhet të jenë në qendër të çdo aksioni të qeverisjes së vendit. Nuk mund të imagjinohet evolucioni i një shoqërie demokratike dhe sociale pa vlerësuar evolucionin e përpjekjeve për fuqizimin e rolit të gruas dhe të fëmijës dhe pa përmbushur detyrimet për mbrojtjen e të drejtave të tyre. Ndaj duhet që të gjithë institucionet duhet të dyfishojnë përpjekjet e tyre në këtë drejtim.”.
Përfaqësuesi i UN Women në Shqipëri, Z. David Saunders, theksoi se “Sado i vjetër apo i ri, ne burrat kemi një rol për të luajtur. Duke nisur që nga akti më i vogël i mirësjelljejes, deri tek veprimet e mëdha për fuqizimin e grave. Fakti se sot jemi këtu, tregon se e kuptojmë nevojën për të vepruar. Tashmë është koha që të ndërmerrni një tjetër hap në zotimin tuaj personal për të fuqizuar gratë dhe vajzat. Duhet të veproni për të influencuar kolegët në parlament, apo familjarët, miqtë tuaj. Bëhuni #HeForShe.”

Aktiviteti u përshëndet edhe nga zv/ministria e Arsimit dhe Sportit, Znj. Nora Malaj e cila theksoi rolin e Ministrisë së Arsimit dhe Sportit në luftën kundra dhunës dhe pabarazisë gjinore dhe mbështetjen e veçantë për organizatat e shoqërisë civile të cilat operojnë në këtë fushë, duke nënvizuar kështu punën e Observatorit për të Drejtat e Fëmijëve si partner të qëndrueshëm në këtë sfidë.
Gjatë këtij aktiviteti, gjimnazistet/ët e zonave periferike në Tiranë, u bënë kështu lajmëtarët e barazisë gjinore dhe një shembull për politikëbërëset/it shqiptarë, në luftën kundër diskriminimit dhe pabarazive.

Dita Portokalli në Kuvendin e Shqipërisë u organizua nga Observatori për të Drejtat e Fëmijëve në bashkëpunim me Organizatat e Kombeve të Bashkuara (UNDP dhe UN Women) dhe Ministrinë e Mirëqenies Sociale dhe Rinisë. Ky aktivitet vjen në kuadër të mbylljes së fushatës UNiTE: “Bëje Botën Tënde Portokalli – Trego se je kundër dhunës” (e shtrirë në periudhën kohore 25 nëntor 2014 – 8 mars 2015) si dhe në mbështetje të lëvizjes globale të solidaritetit për barazi gjinore “#HeForShe” .

Lëvizja e solidaritetit HeForShe është një fushatë globale e shtrirë gjatë gjithë vitit e cila ka si qëllim të angazhojë burrat dhe djemtë në mbarë globin si modele ndryshimi për arritjen e barazisë gjinore dhe eliminimin e dhunës me bazë gjinore e asaj në familje, duke i nxitur ata të ndërmarrin veprime konkrete kundër diskriminit gjinor.

[fbalbum url=”https://www.facebook.com/odf.albania/media_set?set=a.1557552007853740.1073741844.100007968667710&type=1″ desc=”1″ random=”1″]

Situata e përmbytjeve në zonat e Beratit, Fierit dhe Vlorës dhe nevoja për ndërhyrje

Skanimi i situatës nga Observatori për të Drejtat e Fëmijëve

12 Shkurt 2015

Për më shumë se 2 javë Shqipëria po kalon një situatë të vështirë përmbytjesh. Për shkak të reshjeve të shumta të shiut dhe dëborës që kanë mbuluar të gjithë vendin, përmbytjet kanë qenë një kërcënim jo vetëm për shtëpitë, agrikulturën dhe blegtorinë, por edhe për banorët gjithashtu. Bazuar në skanimin e situatës që Obseravtori për të Drejtat e Fëmijëve ka bërë, qarqet e prekura më shumë nga kjo situatë janë Berati, Fieri dhe Vlora. Në Berat përmbytjet janë shkaktuar si pasojë e prurjeve të mëdha të lumit Osum dhe daljes nga shtrati të këtij lumi. Në Fier përmbytjet janë shkaktuar si pasojë e daljes nga shtrati të lumenjve Vjosa, Seman dhe Gjanica, ndërsa në Vlorë si pasojë e daljes nga shtrati të lumit Vjosa. Figura 1 paraqet vendndodhjet e zonave të përmbytyra dhe komunat e prekura më shumë nga këto përmbytje

Figura 1: Zonat e prekura nga përmbytjet

Komunat e prekura më shumë nga përmbytjet, të cilat janë dhe komunat me dëmet më të mëdha të regjistruara në shtëpi, bujqësi, blegtori dhe dëme të tjera fizike janë:

Qarku Berat:

  • Bashkia Ura Vajgurore
  • Komuna Otllak – Fshati Moravë
  • Bashkia Berat

Qarku Fier:

  • Komuna Levan – Fshatet Ferras dhe Bashkim;
  • Komuna Frakull – Fshatet Cerveze dhe Kashishte;
  • Komuna Dermenas – Fshatrat Hoxhare, Povelce dhe Darzeze

Qarku Vlore:

  • Komuna Novosele – Fshatrat Poro, Bishan, Mifol, Akerni dhe Novosele

Figura 2 tregon numrin e familjeve të prekura nga situata e përmbytjeve dhe numrin e familjeve të evakuara në nivel qarku. Në qarkun Berat nga 95 familje të prekura vetëm 1 familje me një nënë beqare është evakuar dhe është strehuar në një nga çerdhet e qytetit, pasi shtëpia e saj është shkatërruar nga përmbytjet. Në qarkun Fier nga 440 familje të prekura 126 prej tyre janë evakuar dhe jane strehuar pranë të afërmve të tyre. Në qarkun e Vlorës nga 500 familje të prekura 120 prej tyre janë evakuar. Në total numri i familjeve të prekura nga përmbytjet është 1035 familje dhe numri i familjeve të evakuara është 247 familje.

Figura 2 : Numri i familjeve të prekura nga përmbytjet dhe numri i familjeve të evakuara në nivel qarku

Figura nr. 3 paraqet numrin e familjeve të prekur nga përmbytjet në nivel komune, ku komuna më e prekur nga kjo situatë është komuna Novoselë në qarkun e Vlorës

Figura 3: Numri i familjeve të prekura nga situata e përmbytjeve në nivel komune

Numri i fëmijëve të prekur nga situata e përmbytjeve dhe të përfshirë në këtë situatë është 1355 fëmijë dhe figura nr. 4 paraqet numrin e fëmijëve të prekur në nivel rajonal.

Figura 4: Numri i fëmijëve të përfshirë në situatën e përmbytjeve në nivel rajonal

Në zonat e përmbytura disa nga insitucionet lokale si Shërbimi Social Shtetëror në nivel rajonal, qeveritë lokale, Stafi i Emergjencave Civile, etj kanë shpërndarë ndihma për familjet. Shërbimi Social Shtetëror në qarkun e Beratit ka ndërmarrë iniciativën të hapë një llogari bankare në ndihmë të familjeve të përmbytura. Deri tani shumë nga familjet kanë kontribuar për këto familje. Drejtoria Rajonale Arsimore në Berat dhe disa shkolla të Beratit kanë ndërmarrë iniciativën të mbledhin ushqim dhe veshmbathje për familjet e prekura.

Në qarkun Fier shumë institucione kanë shpërndarë ndihma si paketa ushqimore (nga 15 kg ushqime), veshmbathje, ushqim për bagëtinë, 800 batanije (gjatë këtyre ditëve do të shpërndahen edhe 1000 batanije për familjet e prekura nga përmbytjet). Qeveritë lokale kanë hasur vështirësi në identifikimin dhe shpërndarjen e ndihmave tek familjet e përmbytura, për shkak të kushteve të këqia në të cilat ndodhen komunat.

Të gjitha qarqet kanë nevoja emergjente për ndërhyrje, të cilat janë bazike në jetën e njerëzve. Nevojat e identifikuara janë:

  • Ndihma ushqimore;
  • Tenda;
  • Krevate portative;
  • Dyshekë;
  • Batanije;
  • Jastëkë;
  • Veshmbathje personale;
  • Ngrohje;

Është identifikuar gjithashtu nevoja për të ndërhyrë në rikonstruksionin e shtëpiave të shembura nga përmbytjet . Një nga kopshtet e qarkut Berat të komunës Otllak, është shkatërruar për shkak të përmbytjeve. Në shumë shkolla të përmbytura, ende nuk ka nisur mësimi rregullisht.

Nisma “Cdo fëmijë Romë në kopësht”

Nisma-Roma1

Të dhëna informuese
Nisma “Cdo fëmijë Romë në kopësht” (Viti I)

Observatori për të Drejtat e Fëmijëve, Shoqata Kristiane e Grave Shqiptare (YWCA), Qendra për Mbrojtjen e të Drejtave të Fëmijëve në Shqipëri (CRCA) në bashkëpunim me UNICEF Shqipëri, që në Tetor 2013 po zbatojnë nismën “Çdo fëmijë Rom në kopsht”. Ky projekt mundësohet nga Zyra e Bashkëpunimit Zviceran në Shqipëri dhe Kooperimi Austriak për Zhvillim.

Zbatimi i kësaj nisme në cdo qark dhe rajon te vendit, ndër të tjera, ka mundësuar përfshirjen e shumë fëmijëve romë në kopësht, e cila pavarësisht sfidave dhe problemeve të hasura në terren, rezultoi që në fund të vitit shkollor 2013-2014 dhe fillimi i vitit shkollor 2014-2015, të kemi në total 981 fëmijë romë në kopësht nga e 12461, ose 79% e fëmijë romë në nivel kombëtar. Si rezultat i zbatimit të nismës “Çdo fëmijë romë në kopsht”, numri i fëmijëve romë në kopsht, në nivel kombëtar, është rritur me 409 fëmijë të regjistruar në kopsht ose 33% më shumë.
Nga studimi i realizuar nga UNICEF në vitin 2011, evidentohet të jenë 396 fëmijë nga 1079 fëmijë romë në total, ose 36% të regjistuar në kopsht, në nivel kombëtar (http://www.sidalbania.org/romacom.html).

Suksese të tjera të arritura nga zbatimi i kësaj nisme në vitin e parë tij (Tetor 2013 – Tetor 2014), janë dhe 184 fëmijë Romë të vaksinuar, 44 fëmijë të regjistruar në Gjendjen Civile dhe 74 fëmijë (të moshave të ndryshme) të regjistruar në arsimin e detyruar, në nivel kombëtar.

I gjithë ky proçes i përfshirjes së fëmijëve romë në kopësht, pati një vëmëndje të vecantë dhe tek komuniteti i prindërve. Gjatë zbatimit të nismës “Cdo fëmijë Romë në kopësht”, në vitin e parë të saj janë kontaktuar dhe biseduar me 2,162 prindër të fëmijëve të komuniteti romë në lidhje me rëndësinë dhe vëmëndjen përkushtuar fëmijëve gjatë zhvillimit të hershëm të tyre.

DEKLARATË PUBLIKE

Mbi rastin e tentativës për abuzim seksual të një vajze 14 vjeçare nga ana e sekretarit të deputetit Koço Kokëdhima në qytetin e Sarandës.

Organizatat që vëzhgojnë dhe mbrojnë të drejtat e fëmijëve në vend, e vlerëson ngjarjen e ndodhur si një rast flagrant të shkeljes të të drejtave themelore të fëmijëve, si dhe një cënim tejet të rëndë të dinjitetit njerëzor të gruas dhe fëmijës.

Rasti në fjalë, i cili ka tronditur mbarë opinionin publik, tregon edhe një herë përpjekjet për shfrytëzim seksual të fëmijëve shqiptarë që bëhen nga persona të veshur me pushtet. Abuzimi i fëmijëve është tashmë një fenomen i njohur dhe kjo ngjarje tregon se sa lehtë mund të shkelen të drejtat e fëmijëve duke shfrytëzuar situatat e dëshpëruara të qytetarëve të thjeshtë për kërkimin e një vendi pune. Ne vlerësojmë maksimalisht kurajon e kësaj nëne dhe gruaje, e cila pavarësisht situatës së saj të varfërisë, vendosi të bëjë publike dhunën,e pamoralshmë të një njeriu të veshur me pushtetin e dhënë nga një deputet i Kuvendit të Shqipërisë, në qytetin e Sarandës.

Nisur nga kjo ngjarje e rëndë dhe tronditëse, organizatat që i janë bashkuar kësaj deklarate, rekomandojnë sa më poshtë:

1. Verifikimin e figurës së çdo personi që është në kontakt me qytetarët, sidomos me fëmijët, për të eliminuar çdo mundësi që persona me tendenca për të kryer krime seksuale të përdorin pozitën apo pushtetin e tyre për të shfrytëzuar fëmijë;

2. Kuvendi dhe Ministria e Brendshme duhet të shikojnë me prioritet miratimin e kërkesës disa vjeçare të shoqërisë civile, për krijimin e Rregjistrit Kombëtar për Krimet Seksuale, në mënyrë që të shmanget kontakti i grabitqarëve seksualë përkundrejt fëmijëve, grave etj.

3. Rritja e efektivitetit të punës të strukturave shtetërore të mbrojtjes së fëmijëve në nivel lokal për t’u gjendur më pranë problemeve të ndjeshme qe kanë të bëjnë me shkeljen e të drejtave të fëmijëve.

4. Media duhët të mbështesë fushatat sensibiilzuese mbi të gjitha format e abuzimit dhe shfrytëzimit të fëmijëve dhe denoncojë çdo rast të tyre, sidomos kur ato lidhen me zyrtarë publikë apo persona të afërt me ta.

5. Krijimi i një task force, ku njerëzit të mund të denocojnë raste te tilla, të ngjashëm me rastin e SHKB të shefit te policisë në Velipojë.

Kjo deklaratë mbështetet nga këto organizata:

– Observatori për të Drejtat e Fëmijëve në Shqipëri
– Qendra për Mbrojtjen e të Drejtave të Fëmijëve në Shqipëri (CRCA)
– ALO 116: Linja Kombëtare e Telefonit të Ndihmës për Fëmijët
– Koalicioni për Arsimin e Fëmijëve
– Shtëpia e të Drejtave të Njeriut
– Shoqata Kristiane e Grave Shqiptare (YWCA)
– Fondacioni” Syri I media së re”
– “Qendra e informimit Arhus” Vlorë
– Partner për fëmijët
– “Edukimi për Shoqërinë e Hapur”
– Women’s Democracy Network Albania
– “Shpresë për të ardhmen” Shkodër
– Shoqata qëndistarët Korçë
– REA OJF
– Ambasada PINK/LGBT
– Qendra për nisma ligjore Qytetare
– Shoqata”Gruaja Nëne dhe Edukatore”
– Gender Alliance for Development Center

Paraqitja e dixhitalizuar e treguesve të përjashtimit social të fëmijëve në Shqipëri

Tiranë, 4 Dhjetor 2012 – Paraqitja e dixhitalizuar e bazës të të dhënave mbi treguesit e përjashtimit social të fëmijëve në Shqipëri, në nivel rajonal (për secilin nga qarqet e vendit) bëhet me qëllim nxitjen e ndërgjegjësimit të shoqërisë shqiptare mbi çështjet kritike t fëmijëve, të cilat ndikojnë në mohimin e të drejtave të tyre.

 

Observatori i të drejtave të fëmijëve synon të vëzhgojë realizimin e të drejtave të fëmijëve në nivel kombëtare dhe në çdo qark të Shqipërisë, të analizojë e përpunojë informacionin sipas këndvështrimit të shoqërisë civile si dhe të nxisë diskutimet e grupeve të interesit për realizimin gjithëpërfshirës të të drejtave të fëmijëve.

 

Observatori të Drejtave të Fëmijës është një iniciativë e UNICEF, me qëllim forcimin e aleancave dhe harmonizimin e bashkëpunimit për të rritur përpjekjet efektive për realizmin e të drejtave të fëmijëve. Observatori i të Drejtave të Fëmijëve është një mekanizëm i shoqërisë civile, i aftë për të tërhequr rreth vetes të gjithë aktorët dhe vetë fëmijët nën nismën: “Çështja e fëmijëve është çështje e të gjithëve”.

Deri tani, Observatori ka përgatitur dhe botua disa raporte, të cilat ofrojnë informacion të detajuar mbi treguesit kryesorë të realizmit ë t drejtave të fëmijëve. Me qëllim që informacioni i pasur i grumbulluar, të shërbejë në mënyrë sa më efektive për të gjithë rrjetin e institucioneve qeveritare, jo qeveritare dhe akademike, Observatori kërkon të realizojë “Paraqitjen e dixhitalizuar të treguesve të përjashtimit social të fëmijëve në Shqipëri”.

 

Dixhitalizimi ndihmon në paraqitjen e shpejtë dhe të detajuar të informacionit mbi institucionalizimin e të drejtave të fëmijëve, në çdo qark të vendit; gjithashtu krijon mundësinë e përdorimit të informacionit mbi treguesit e varfërisë dhe të përjashtimit social të fëmijëve në çdo qark, bashki, komunë të vendit, nga çdo institucion/ specialist/ qytetar i interesuar. Përgatitja dhe shpërndarja e 12 fletushkave informative për secilin qark të vendit si edhe e një broshure me informacion përshkrues dhe statistikor në nivel kombëtar lehtëson përdorimin e informacionit mbi të drejtat e fëmijëve si edhe bashkëpunimin me rrjetin e Observatorëve për të drejtat e fëmijëve.